شمارات.. سلك | وتبيض هناك

*قصة مصر دايرة مصلحتنا دي أنا مابصدقها

*المصريين ديل صالح ورقهم أهم ليهم من أي زول

*وعندهم تبرير لأي تصرف يتصرفوهوا

*ياخ قالوا واحد قال لي مصري انتوا تاكلوا مال النبي

*المصري مانكر

*ولافكر

*جاوب طوالي

*وقال

*ومالو؟ حبيبنا

*المهم

*ناس الحوار السوداني سوداني المشوا بيهو مصر ديل بالغوا

*بالغوا جنس بوليغ

*شابكننا نقة هنا واعتصامات واتفاقيات وأهلنا الذين   و و و

*يكاكوا هنا ويمشوا يبيضوا في مصر

*ومصر عشقها الفرخة اللي تبيض دهب

*فضوها سيرة

*يا أركبوا في المسيرة

*يانفرتقها

*فلقد سئمنا التنازلات لأجل  التمسك بوطن واحد يسع الجميع

*فإن لم يكن الجميع على قلب رجل واحد

*تبقى عربيتنا دي حاتستنزفنا صيانات واسبيرات

*الأفضل نجزرها

*نفرتقها صامولة صامولة

*بالطريقة دي الشاسيه مابقدر يشيل (البودي)

*لأنو البودي كلو رفرف فيهو ماشي على جهة

*نصين المكنة

*الجربوكس يشبك

*نصلح الجربوكس

*الفحمة والطارة والدبرياش يتحتن

*نغيرهن الكلتش يقع

*والجربوكس الاوتوماتيك مع عربيتنا دي مابنفع لانو مافي شي مبرمج ولاننا مابرمجنا شي في حياتنا

*الترضيات والتنازلات مابتحل مشكلة

*الموضوع يبقى واضح

*والواضح مافاضح

*المهم

*ملاحظين كلو يوم زفة في الشارع

*عربات وهزارد وشباب من الجنسين (باظين) من الشبابيك وصفافير وطرح طايره

*زفة تخريج

*يومي الجامعات بتخرج

*والجامعات ليها أربعة سنين ياماشغالة

*ياشغالة هزاز

*بتخرجوا كيف ماعارف

*وبقروا متين إلا لو باللايف

*يكونش المحاضر بطلع ليهم لايفات

*والامتحانات واتس ولا كيف؟؟؟؟

*وبمناسبة الجامعات

*المدارس

*المعلمين

*الإضراب

*منو العلي حق ومنو الباطل؟؟؟

*وهل ماتقوم به لجنة المعلمين تعسف في استعمال الحق؟؟؟

*ام ماتقوم به الدولة هو تهرب من الحق؟؟؟

*الغريبة أمس في زول قال لي اي طالب في المدارس الحكومية بدفع رسوم تسجيل (قيد) ألفين جنيه

*اضرب الفين في عدد طلاب المدارس الحكومية

*وشيل المبلغ ده كلو وديهو الوزارة

*حاتسأل نفسك

*قروش مافي كيف يعني؟؟؟؟؟

*ياليت الوزارة لو كانت بتخلي رسوم القيد للمدرسة عشان تطور بيها نفسها وتحسن بيها بيئة العمل

*بيئة بيئة

*يا الفي مصر

*ارجعوا لي سودانكم يرحمكم الله

*أها

*نجي لي شمارات والي الخرتوم

*كان شفت يا والينا

*مصر لو ماشربكتنا مشكلة مابتحلها لينا

شمارات الكلب

ننساك كيف والكلب قال حايقولوا ليكم جات الحزينة تفرح مالقتلهاش مطرح… تطلع من بيتك حزين تلاقي الفرح عند مين؟؟؟

وإلى لقاء