شمارات.. سلك | يا حليل البنقو !

*بحَّ صوتنا نبيحاً حول مشكلة المخدرات التي انتشرت بفعل فاعل (فاعل) في مجتمعنا المسكين
*وبدت المبادرات تأخذ مواقعها لحرب المخدرات
*لكن الدبابة الكبيرة لازالت خارج أرض المعركة
*ولعلها مادايرة تدخل في الحرب على المخدرات
*وصلنا مرحلة بقينا نتحسر فيها على بنقونا
*ونفتقده
*ياحليل البنقو
*افتقدناه وسط المصائب الجاتنا
*والجاتنا تختانا
*أيها الناس
*إنها معركة أمة
*والأمم لاتعتمد فقط على حكوماتها في الحروب الكبيرة على الوطن والمواطن
*ولأن الأمر كذلك
*يجب على أمة الأمجاد أن تعي دورها كاملاً
*وتنفض ايدها من الحكومة في هذه الحرب
*الحكومة مشغولة بضرب المواكب وتفتيت المظاهرات واعتقال الناشطين وتتريس الكباري بالكونتينرات
*ماعندها عدة ولا عتاد عشان تشارك بيها في الحرب على المخدرات
*عشان كده حقو نعتمد على شعبنا في هذه المواجهة
*المستهدف هو الشعب
*يبقى الشعب يدافع عن نفسو
*مستفيداً من حق الدفاع الشرعي يستطيع أن يتجاوز كل الخطوط الحمراء في الحرب على المخدرات
*ومناشدة خاصة للجان المقاومة
*ياحراس الثورة
*أنتم أكثر فئة مستهدفة من انتشار المخدرات
*من يستهدفكم لايفرق بين كبير وصغير
*ولا بين بنت وولد
*ولأن البلد بلد البنت والولد
*تجدون أنفسكم في الصفوف الأمامية في الحرب ضد المخدرات
*بوعيكم الكبير
*بانتشاركم الواعي في كل شبر من مساحات الثورة
*بحبكم لوطن تتمنون له الازدهار
*بإيمانكم بقدراتكم الكبيرة ومقدراتكم المقدرة
*وبربكم
*تستطيعون أن تنتصروا على المخدرات
*والجابه
*وتفشلوا الهدف من نشرها
*دون حاجة لأي دعم حكومي
*شرعيتكم الوطنية تؤهلكم لخوض الحرب باسم الوطن
*ويا حليل البنقو
*البنقو الكنا بنخاف من اسمو
*طلع أي كلام يا راجل
*البنقو الزمن ده
*ممكن تطفيها بي جاي
*وتصلي بي جاي
*مابقطع الوضوء
*موش زي الجانا جديد ده
*يقطع الوش من الدنيا ويقطع الخميرة من البيت ويقطع الإحساس بالذات وبالوطن وبالثورة
*يا لجان المقاومة
*الوطن عشمان فيكم
*وما اتعود منكم كسر الخاطر
*أبقوا كتار ودمروا الدمار
*والجاب الدمار
*وعشان وطني البعزو على
*ترابو الغالي في عيني
*أقدم روحي ليك ساهلة
*أموت بحداك وتفخر بي
*أها
*نجي لي شمارات والي الخرتوم
*كان شفت يا والينا
*قال ليك الكمدة بالرمدة رغم الرماد الفينا
*من أول لحظة بتودينا
شمارات الكلب
ننساك كيف والكلب قال الجديد ده قالوا تشيل النفس بي جاي تقطع نفس بي جاي.
وإلى لقاء