شمارات.. سلك | يعني (بالغانون)؟

*تقول الأنباء (أنا ما متأكد)
*تقول إن المحكمة أدانت حرم الرئيس السابق
*ويقولون
*ناس الأنباء إن من بين الإدانات صرف معاش زوجها المنتقل إلى رحمة الله
*تبادر إلى ذهني سؤال
*هل قامت السيدة وداد بفتح خزنة الجيش وشالت المعاش؟ ولا بصرفوا ليها ناس الجيش؟
*وفي الحالتين أنا الضائع
*طيب منو البستحق معاش إبراهيم؟
*طبعاً زوجتو وأبوهو وأمو وأولادو بنين وبنات
*والبنات ديل بالذات بستمر معاهن إلى أن يتزوجن أو يشتغلن ويستقلن
*والزوجة ذاتها بسقط عنها بزواجها
*قول سقط عن وداد
*موش بمشي كاملاً لأبناء وبنات المعاشي؟؟؟
*طيب إذا نزل في حساب أمهم المشكلة وين؟؟؟
*وهل كل مشاكل البلد دي وزمنها بقن في صرف معاش؟؟؟؟
*طيب قول غلط تصرفو
*الصرفو ليها موقعو شنو من البلاغ؟
*هل هي التي بددت مال (الديش) ولا هو؟؟؟؟
*أيها الناس
*منذ نجاح الثورة قلنا روح الانتقام لن تبني بلد
*ماقلنا من أخطأ يترك
*قلنا الأمر شخصي وكل شاة معلقة من رقبتها
*لكن سياسة الإقصاء بالجملة ماحبابها
*ومن شعاراتنا
*حرية سلام وعدالة
*ويجب أن تسود العدالة معنى ومضمون وواقع
*وأن نقدمها حتى لمن استكثرها علينا وحرمنا منها
*لاننا نحنا مازيو
*وإذا كنا بنشيل الناس من طرف أو لمجرد الانتماء أو الشك في الانتماء
*يبقى فرقنا شنو من الناس الكتلوا الناس بالصالح العام؟؟؟؟
*ثورتنا مدرسة
*مدرستنا
*يجب أن نلتزم حدود دروسها
*فلا مبرر لخطئنا عشان من أخطأنا في حقو ناسو غلطوا فينا
*دايرين نبني وطن
*وطن الحرية والسلام والعدالة
*يبقى نسلك السلوك القويم مع الجميع
*ونستصحب كوادر البناء دون تفرقة عرقية أو جهوية أو انتماء سياسي
*والغلط يتجازى
*والبلعب بي ديلو على وشو نديلو
*أيها الناس
*إنهم نحن من عرقل سير الدولة وسمح للناس ديك بالتدخل والنط على عنق الثورة العظيمة
*خلونا منطقيين
*ننادي بالمدنية
*ونعرقلها نحن المدنيون
*وتغرق مدني
*عشان كده حقو مانسكت
*دايرين نبني بلد
*بس ما بالأغاني
*بالجد
*ياما غنينا ياي بليدنا وكلنا إخوان
*لمن ياي لحقت أمات طه وبقت الدولة الشقيقة
*أيها المدنيون
*إن كنتم فعلاً تريدون المدنية
*لماذا لاتتحالفوا لأجل إرساء المدنية في هذه المرحلة؟؟؟
*السياسة موش هي جعل المستحيل ممكن؟
*فن الممكن
*مرة الترابي أثناء عدائه للإنقاذ
*قال مستعد أتحالف مع الشيطان لإسقاط البشير
*فهل في أحزابنا اليوم من هو أسوأ من الشيطان حتى لانتحالف معه؟؟؟
*أها
*نجي لي شمارات والي الخرتوم
*كان شفت يا والينا
*ياي مشت بعد غنينا
*بقينا نخاف من الغنا يا أخينا
*دارفور بلدنا.. نقول استر بينا
*عروس البحر إن شاء الله ماتفارقينا
*اتنينا
*ومدنينا
*والنخب النيلينا
*الله يسترنا من الغنا يا والينا
شمارات الكلب
ننساك كيف والكلب قال والله ماتقعدوا بأدبكم ألم الكلاب وأغني خرطوم بلدنا.
وإلى لقاء