شمارات.. سلك | كديس المستشفى

*زمااااااان
*بدري الكلام ده
*طووووول
*أيام كان يا ماكان
*في قديم الزمان
*وطن اسمو السودان
*في الزمن داك
*كان عندنا وزارة صحة
*أحه
*هي وزارة صحة ساي
*صحة زي الصحة
*وكان عندنا مستشفيات حكومية كبيييييرة
*فيها من المستر البسمو الوحدة عليهو
*للطلاب البتدربوا
*والممرضين فاتحين صدورهم للعمل والممرضات فاتحات صدورنا للعلاج وبانشراح
*وكان في معمل مجاني في كل مستشفى
*وكان في صيدلية تقدم الدوا مجااااااني
*وفي عنابر فيها سراير ومراتب ومخدات
*وملايات بتتغير يومي
*وكان في وجبة للمريض
*لبن زي اللبن وشوربات وعصائر
*هو الماكان في شنو؟؟؟
*وكان يا ماكان
*غير المستشفيات الحكومية
*كان في مصحات ومراكز صحية تقدم الخدمات الطبية المجانية بمنتهى رحابة الصدر
*وزارة الصحة كانت قايمة بدورها المنوط بها على أكمل وجه
*والدليل أن فطاحلة الطب والأسماء الكبيرة
*كانت كلها تنتمي لوزارة الصحة
*لانو كان ياماكان
*عندنا دولة
*تؤمن بالمواطن
*وتقدم له حقوقه كلها
*وأولها حقه في العلاج والرعاية الطبية
*كان ياماكان عندنا أكبر مستشفى متخصص للولادة في أفريقيا
*الوكت داك العالم العربي مافي
*كان عندنا (الدايات)
*وترتبط تلك الدايات بنكته
*في محطة بص جمبها
*الكمساري يقول دايات يا حد نازل؟؟؟
*زول بفتح خشمو مافي
*بخجلوا
*النسوان شايلات العمدان وحفاظات الشاي والجبنة
*والرجال عاملين رايحين
*برغم انو مافي راكب أو راكبة رد على الكمساري حينما نادى
*دايات يا حد نازل
*إلا أن السواق بقيف
*والبص كلو بنزل
*الناس كانت فايقة ورايقة وبتلد يومي
*الحول بي زول
*المافي شنو والمعدوم شنو
*والنفوس متطايبة
*أسي الولادة بقن يكوسنها في الهند
*شي أنابيب وشي مجهري
*ووحدات يختوا ليهن شايل شنطتو ومسرح وماباقي ليهو إلا يمشي مدرستو
*وبرضو يفشل
*حكمة من الله
*المهم
*كانت وزارة صحتنا كذلك
*ولكن حين مسها الضر
*وتخلت الدولة عن مسؤولياتها
*ونبتت المستوصفات التجارية
*تمشي ليها ضرسك واجعك
*يفحصوا ليك وظائف الكلى
*تمشي ليهم حاجة متكلة على أكتاف أحفادها من الرطوبة
*يشبكوها صور لزوم الفاتورة
*ماتستبعد تكون معاهم صورة للبروستاتا
*كل شي جائز
*المهم
*في الوكت داك
*أيام المستشفيات مزدهرة
*كان في كديس المستشفى
*منفخ وبيبي فيس من الشحم
*التقول بالع كورتوزون
*أسمن مخلوق في سودان الزمن داك
*لأنو بعتمد في معيشتو على بواقي أكل المستشفيات
*مجرد بواقي
*ولكن
*تلاشت وزارة الصحة
*وتبعتها المستشفيات الحكومية
*وظهر كديس المستشفى بشحمه ولحمه ضمن قطط المستوصفات السمان
*القطط السمان
*أها
*نجي لي شمارات والي الخرتوم
*كان شفت يا والينا
*كديس المستشفى ماكان بعضينا
*لكن القطط السمان يوماتي بتاكل فينا
شمارات الكلب
ننساك كيف والكلب قال عمري مانبحت في كديس مستشفى… لكن القطط السمان بح صوتنا خلفها ولا خافت يا والينا.
وإلى لقاء