شمارات.. سلك | كعب البنقو الكعب

*أمس كتبت عن المخدرات
*وحذرت من خطر يهدد بقاء أمة وكبرياء وطن وأحلام شهداء
*قالوا في واحد قرا العمود
*وبعد داك علق
*قال كعب البنقو الكعب
*المهم
*لسسسه بحذر من خطر يهدد الأمة اسمه المخدرات
*وإذا ماقمنا كلنا كمجتمع مسؤول بمحاربته
*ستنهزم الأمة
*وإذا انهزمت الأمة حاتطير
*المهم
*لازالت الطماطم واقفة معانا وساترانا
*برغم إنو الدكوة رافعة القزاز
*إلا أن السترة حاصلة
*وماتقوم به الطماطم لم يقم به وزير ولا حاكم
*الوحيدة الفي البلد دي شايلة هم المواطن وبتضحي من أجلو وتقدم نفسها قرباناً لأجل بطن مواطن سكنها العنكبوت
*يعني لو لاقاك مواطن بطنو واجعاهو
*ماتديهو دواء
*جيب زعافة وزعفها ليهو
*بكون العنكبوت عامل عنكبة
*أخي المواطن
*لو اتضامن زيت السمسم مع الطماطم
*والعيش (الرغيف) نزل نخرتو الرافعة دي وبطل يجرنا خمسين
*والدكوة شوية عادت لرشدها
*تفتكروا فاضيين لي زول تاني؟؟؟
*اللهم اجزي الطماطم عنا خيراً
*اللهم ولاتجعل لها موسماً واحداً
*بل اجعل كل السنة موسماً لها عشان نعيش يارب العالمين
*أيها الناس
*قوموا لطماطمكم يشبعكم الله
*المهم
*انعقد الاجتماع الكان لامي اللجنة الأمنية والقوات العسكرية والجهات المسؤولة
*نضموا في المخدرات نضم شديد خلاس
*لكن النضمي براهو مابكفي
*النصيحة براها مابتكفي
*واقترح إنشاء جهاز رقابي مختص بالمكافحة
*يتكون من قوة مشتركة
*حتى المواطن الصالح ممكن يكون ضمنهم
*بصلاحيات واسعة
*واختيار دقيق يركز على الذين يؤمنون بالقضية
*قضية الحرب العالمية
*قضية الحرب على المخدرات
*وأن تصحب ذلك عقوبات
*المروج الإعدام
*لو باع نفس أو نص حبة يعتبر كأنه باع الكريستال كلو
*المتعاطي أو المتعاطية (كترن) السجن تلاتة سنين
*العين الحمراء وحدها هي من ينقذ الناس
*والمروج بإعدامه ننقذ المجتمع وبرضو بننقذو هو من سيئات أعمالو
*والمتعاطي بسجنه ننقذه من الإدمان
*أما المتعاطية فدي (الإنقاذ ذاتها)
*اللهم أدمها طماطم وأحفظها من الضياع
*أها
*نجي لي شمارات والي الخرتوم
*عرفت يا والينا
*ليه المصريين بقولوا بت يا طماطم؟
شمارات الكلب
ننساك كيف والكلب قال نحنا ذاتنا كان ما الطماطم كان انقرضنا زماااان … زول يقول (هو) ماكان لقيتوهوا .
وإلى لقاء