شمارات.. سلك | لا للمخدرات

*لا للمخدرات شعار نرفعه سااااكت

*في اليوم العالمي لمكافحة المخدرات

*أو في المناسبات

*ولانهتم بإنزاله على أرض الواقع

*ومحاربة الاتجار بالمخدرات ومكافحة الإدمان

*ليست مسؤولية الجهات المناط بها ذلك

*بل هي مسؤولية المجتمع (كووولو)

*الأمر جد خطير

*ويصيب الوطن في مقتل في المستقبل

*لأن الشباب يشكل غالبية الشريحة المستهدفة من دول أخرى كاستراتيجية ومن داخل الدولة كعملية سياسية قذرة ومن تجار المخدرات والعصابات وحتى التجار الصغار على مستوى الحي

*لذا المكافحة تبدأ من هذا الحي

*لا للمخدرات بدون استثناء

*لا للمخدرات المزروعة

*ولا للمخدرات المصنوعة

*ولا للمخدرات المشمومة

*والمبلوعة

*والمطعونة

*والفي كباية قهوة معطونة

*لا للمخدرات الوهمية

*والحكومية

*والحكومية دي بالذات تشكل أخطر الأنواع وأشدها فتكاً

*وهي على شاكلة كريستال حانسلمها

*وحبوب اتفقنا

*وبنقو التعايش السلمي الملفوف على فوهات الهاون على ظهر التاتشرات

*يامعشر الشباب

*إذا دايرين ثورتكم تنجح حاربوا المخدرات

*حتى لاتفقدوا محاربين بسبب الإدمان

*فكم من جهة تعمل باستراتيجية لدفع أكبر عدد من جيشكم الثوري لبحر الإدمان

*وعندها تبقوا لابتحسوا لابتشعروا

*وبالتالي لابتحسوا بي وطن ولابتشعروا بمسؤولية تجاهه

*حاتقعدوا ساي

*وقتها سترحل كل الكونتينرات من أمام الكباري

*تاني القعدات ليها شنو؟؟؟

*أيها الناس

*المجتمع والأسر ساعدت على انتشار هذا الوباء

*في الحلة عارفين المروج وساكتين

*زول بكتل في أولادنا يومي ونسكت عليهو

*وفي نفس الحلة عارفين (الخانة) وعاملين حميل

*وفي الحلة ذاتها نشوف (المصقوع) ونسكت

*ومرات نضحك

*ثم في المدينة

*ثم في الولاية

*ثم في كل الوطن

*حتى في الأماكن العامة

*ويصل الاستهداف لطلاب المدارس

*تلاميذ

*والأسر ياما بتلاحظ

*يا مامهتمة

*ودونكم الشوارع الآن

*شوف كم شاب تايه وماعارف حتى اسمو

*أيها الناس

*ساعدنا على انتشار المخدرات حتى بي نكتنا

*واحد مسطول فعل

*وواحد مسطول ترك

*وترتفع ضحكاتنا

*ولا نلاحظ أن الأقدار تضحك علينا

*مجتمع في طريقه إلى الضياع

*قال واحدة كبيرة ولدها بتاع بنقو

*قدر ما اتكلمت معاهو

*ماهماهو

*يلف ويولع

*فجأة خلاهو

*حاجتو فرحت

*وبقت تفخر بذلك في المجتمعات

*يوم قالوا ليها

*صاح ياحاجة خلي البنقو لكن بقى بتاع آيس وخرشات

*قالت يعني شنو؟

*شرحوا ليها ذلك وخطورة ذلك والتأثير السالب على الأعصاب والتشنج وفقدان السيطرة على النفس والجسد

*قامت اتوضت وصلت ركعتين لله

*سألت ربنا

*اللهم خليهو يخلي الآيس والخرشة ويرجع لي بنقوهو الزمان يارب العالمين

*أيها الناس

*لا للمخدرات لاتصبح واقعاً

*إلا إذا قمنا كلنا كمجتمع بمحاربتها بدءاً من الحلة

*وتوصيل معلومة من يروج في الحلة أو الحي أو الجامعة أو حتى المدرسة

*والمدمن ماخلاس اتدمر

*تعالوا نساعدهم على العلاج من الإدمان

*ونوصلهم للاختصاصيين

*الحياة دي واعي يا الله يا الله

*تعيش فيها مسطول وخارش ومريل وطارش وساكي الآيس كيف بس؟؟؟

*أها

*نجي لي شمارات والي الخرتوم

*كان شفت يا والينا

*كل أنواع المخدرات متوفرة لينا

*وأنت رئيس اللجنة الأمنية قالوا لينا

شمارات الكلب

ننساك كيف والكلب قال يا مسطول واحد فول بقى تلتلة جابت ليها آيس ورايش…اعقل يازول.

وإلى لقاء