التسوياب ، بكرة الركوب مجاني والكرامة نفر
عمار العركي
عصر الجمعة2/12/ 2022م
* (بكرة) السبت 12 / 11 يوم حاسم في عربة مسيرة عربة تسوية (ابو لمبة) ، النصف نقل ، تحمل (أقلية بلعيش) ، مكتوب علي خلفيتها ( بكرة التوقيع ) وحتى اللحظة (بكرة) دي ما جات ولا بتجي .
(الليلة قرارات تمهيدية من البرهان وبكرة التوقيع والليلة ) الليلة والوقفة وبكرة العيد ، بكرة عربة السفارات متحركة ، سايقاها الامارات ، والكمسنحي (فولكر) لسه في (محطة جوبا) بنادى فى (الركاب) و (عبدالواحد محمد نور) بلكنة اجنبية خبيثة ( تسوية ، تسوية، تسوية، تسوية نفر ) ، وعبدالواحد (القطيم وواقعة ليهو) قال ليهو (عربيتك دي ما دسيسة، مكنتها فيها بخرة ، ومساعداتها الامامية ضاربة ، ومقاعدها شوية وضيقة.. فشنو.. اتفكفك من هنا يا عمك). ورجع (فولكر) من (محطة جوبا) ، من غير توريدة ، مشي (فاضى ورجع فاضى) ، ولما وصل (الموقف) عشان يخش النمرة ويركب الزلط من تاني ، لقى الموقف (كاااااشف) ، ومافي اي (عربية) فى النمرة والموقف مستف على الآخر بالركاب الواقفين (منتظرين جيتو) ، عمك فولكر المسكين قايلهم (رُكابو وناسو) ، لكن نطٌ واحد (متشالق) من وسطهم ، قال ليهو ( شوف يا عمك ، نحنا اصحاب (الموقف ده ) ،وكل المواقف ، من 1 الي 4 ، ركابك انتظروك وشتتوا من هنا ، وقالو (بكرة) التوقيع والركوب (مجانى)، فشنو ياعمك ،، شتت من هنا والحق ناسك قبال يوقعوا من غيرك.
* غايتو (عقاب باقي الجمعة.دي ، ويوم باكر) ، بنرتاح من (جوك جوك) ، وكل الطلس والشائعات والوهمات والجلكسات كلها تجمعت واتحدت في (حركة) في شكل وردة من غير صامولة ، بتقول بكرة التوقيع وركوب الأقلية ، بحضور كل أصحاب والأجندة (الخبيثة)، وبداية فتح المزاد امام أصحاب المصلحة (المخابرات والسفارات والبعثات، والسماسرة والعملاء) واذا حركة يوم (بكرة) ما حصلت – ولا حا تحصل – ، واذا لقينا موقف الكرامة في (مكانو لا آزالوهو ولا رحلوهو) ،، تاني ما نسمع لينا (بغم)، ولا عربية تسوية (ترترت) ، ولا نشم ريحة (دخان البخرة) ولا نشوف (ضؤ ابو لمبة) يبقبق ، وما نسمع صوت الكومسنجى الاجنبى (يكورك) ، (عدا) الكومسنجي المحلى ، البنادي (كرامة كرامة كرامة ، الكرامة نفر)
