في السلك.. تصووور روعة المشهد

بسم الله الرحمن الرحيم

*روعة المشهد كانت في افتتاح مونديال قطر
*مهما حكوا ليك
*ولو شفت بعينك
*ولو شاهدت الحدث من شرفة الشيخة موزة
*مابتقدر تتصوووور روعة المشهد
*قطر كدة
*الجنة كيف؟
*جنة تجنن
*ابداع في اي شي
*في التصميم
*في التنفيذ
*في التنسيق
*في الخيال
*في التصور
*في الاخراج ده
*ابداع
*تتفرج في شنو؟؟؟
*في السواري جمب الاستاد
*ولافي الدفارات إياها البدقوا صاجة بالعصايات
*ولا في قشر قصب السكر المخضبة بيهو ارضيات الاستادات
*ولافي ستات الشاي وسط الجمهور علي المدرجات
*يشعلن النار
*ثم يطفين لهيبها بجردل موية
*ويكشحن الباقي
*ياكلن قسمتهن ويتخارجن
*حافظات جدول الدوري اكتر من اللجنة المنظمة
*قطر ياخ
*وآلله نحنا ابعد من هذا الزمان بآلاف السنوات الضوئية والصوتية والمرئية
*نحن بالضبط بهناك للعصور الوسطي
*ويا حليل المحطة الوسطي
*انا ذاتو ماعارف نحنا في الدنيا دي قاعدين لي شنو
*كل الناس ادهشت العالم بانجازات وطفرات
*الا نحنا
*ما ادهشنا العالم الا بسجمنا ورمادنا وقباحة مدننا
*ادهشناهم بثرواتنا التي نملكها ونحن افقر شعب
*نحنا عالة علي العالم
*المهم
*اتصل بي الاستاذ الصحفي محمد علي جار الله
*مؤسس سودانايل
*اول صحيفة الكترونية
*اتصل بي والدهشة تلجمه من عمايل قطر
*سألني
*اتحادنا قدم طلب للاتحاد القطري عشان يدونا واحد من الاستادات دي ولا ماقدم؟؟؟
*قلت ليهو اتحادنا هو عارف انو مفروض يقدم؟
*قال لي تونس قدمت ووافقوا ليها
*نحنا مفروض نقدم سريع
*قلت ليهو نحنا بنقدم المشاكل علي كلو شي
*ناس اتحادنا ديل لو مشوا ساي هناك
*البمبان بفرتق كاس العالم
*قال لي اتواصلت مع زول واصل في قطر
*قال رسلوا خطابكم للاتحاد القطري والباقي علي
*قلت ليهو قول ادونا الاستاد
*والله الا يخلوهوا قبلو
*لانو لو شحنوهوا
*صدقني مثلث برمودا ببلعو
*زوووت كدة
*لاقطر تلم فيهو لانحنا نلم فيهو
*وحتي كان وصلنا
*بصلنا بدون نجيل
*لاهجين ولاعجين
*بصلنا نقعة زي راسي ده
*قال لي انت اعمل العليك وكلمهم
*قلت ليهو اكلم منو؟
*هم تفتكر قاعدين؟؟؟؟
*ديل بكونوا مدورين لقيمات في خور فكان
*شاي لبن ياعمك
*اللهم هل بلغت؟؟؟

*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*استادات قطر دي كلها الطوفشن بينا
*مافيهن استاد قصوا شريط افتتاحو بي شاكوش زي استادا لينا
*عرفت ليه هم متقدمين ياوالينا
سلك كهربا
ننساك كيف والكلب قال قطر تشهي في الكوزنة
والي لقاء
سلك