العيكورة يكتب: حُمى (خفيفه) يا سهير

بقلم / صبري محمد علي (العيكورة)

خاص ب[صوت السودان]

بعد إنتهاء هذا اليوم الاغر لمليونية الكرامة والكيف الشديييد الواحد شاعر بيهو

(قلتا) ياولد اتمشى شويه فى قروبات (اخوانا) القحاطة ! ياخ حالهم لا يسر عدو ولا صديق وجنس كضب لكن !

 البقول ليك فشلت مليونية الكيزان والبقول ليك (المئات تجمعوا) ومش عارف من يكتب انهم خرجوا تحت حماية الشرطة ! يا جماعة الشرطة دى ماااا كل مليونية بتكون حاضرة الجديد شنو ؟ الجديد لان هؤلاء العقلاء والغبش والسواد الاعظم لم يحرقوا لستكا واحدا ولم يخلعوا (انترلوكاية) واحده اذا الشرطة (حا) تقول ليهم تلت التلاتة كم؟

من امس (ولد عمنا) كمال عمر بتاع الشعبي القاعد ليهم رجالة سااكت كأمين سياسي للحزب قال ما معناه انهم فى الشعبي (غير معنيين بمليونية المؤتمر الوطني) !

بسسسسم الله يا ود بدر (دى واحدة) تانية …

(ولدنا) الهارب صلاح مناع عضو لجنة ازالة التمكين فى العهد البائد (الثاني) قال ان الاسلاميين خرجوا بايحاء من العساكر وانه (اى ولدنا صلاح) يعلم الشركة التى مولت المليونية وطالب (العالم) الخارجي ان خلو بالكم و عووووك (الحقوا الكيزان جو) وكان نفسي اسأل مناع سؤال واااحد ماكل معاي جمبة لممن عامل لى حمي (منو الاوعز ليك بالشتيت) قبل انقلاب ٢٥ اكتوبر بايام قليله جدا . و ياخبر بفلوس بكرة بلاش .

(التالته) …

كانت عبر صحيفة (صوت السودان) الالكترونية بتاعت الزميلة الاستاذة سهير عبد الرحيم . الصحيفة دى لغااااية لحظة كتابة هذه السطور امسية السبت الساعة (تمانية) بتوقيت السودان عملت رايحة خااالس من احداث مليونية الكرامة .

(إلا إنو) فى وقت متثائب نشرت ما معناه الاتي …

وقبل اقول ليك الاتي ده

اولا الصحيفة لم تكلف نفسها بارسال محررها الى شارع الستين او حاجة بالشكل ده واظنها والله اعلم عملت بمبدأ(الما بدورك فى الضلمة بحدر ليك) فقالت شنو ؟خلي بالك معاي

انو فى مظاهرة او مليونية ده ما مهم وان الخرجوا فى حدود الثلاثة الف !! (اااي والله ده المكتوب) و اشارت لنوعية الشعارات التى رددها المتظاهرون . (لحد هنا) يفترض يكون المصدر شنو ؟ الصحيفة او نقلا عن صحيفة جارة مثلا لا قال ليك افاد صحفى بفرانس برس بالخرطوم !! (احييي ياركبي من الحمي)

ياجماعة … يا اهل الصحافة شارع الستين وينو وتقاطع اوماك وينو خلونا نحن اهل العوض ديل ما بنعرفن خااالس انتو ياصحفي الخرطوم ومراسلي الصحف والمواقع الجديدة يا اولادنا غبروا اقدامكم ساعة فى سبيل الوطن والحقيقة والمعلومة المؤكده

مش تقول لى والله ما شفتا لكن جابوه لي)

قبل ما انسى :—

استاذة سهير معقول (العرس) ده كووولو تغيب عنه (صوت السودان) . ياخ ما قلنا ايدوهم بس كونوا حضورا . وحتى لا تتلون [صوت السودان] سنحسن الظن ونعتبرها كبوة جواد

امسية السبت ٢٩/ اكتوبر ٢٠٢٢م